ᠵᠤᠪᠬᠢᠨ ᠳᠤ ᠳᠡᠭᠦᠵᠢᠩᠨᠡᠭᠳᠡᠭᠰᠡᠨ ᠨᠢᠯᠪᠤᠰᠤ 
                          ᠨᠠᠮᠵᠢᠭᠤᠨ ᠰᠦᠨᠢ

       ᠨᠢᠭᠡ
ᠲᠤᠯᠤᠭᠠᠢ ᠬᠤᠯᠪᠤᠯᠳᠤᠭᠰᠠᠨ
ᠮᠠᠩᠬ᠎ᠠ ᠵᠢᠯᠠᠭ᠎ᠠ ᠨᠤᠭᠤᠳ
ᠨᠤᠳᠤᠭ ᠤᠨ ᠲᠡᠦᠬᠡ ᠶᠢ ᠬᠦᠦᠷᠨᠢᠵᠦ
ᠲᠤᠭᠤᠯ ᠬᠠᠷᠢᠭᠤᠯᠤᠭᠰᠠᠨ
ᠪᠦᠷᠢᠲᠤ ᠴᠠᠢᠳᠠᠮ ᠨᠤᠭᠤᠳ
ᠡᠵᠢ ᠶᠢᠨ ᠳᠦᠷᠢ ᠶᠢ ᠱᠤᠭᠤᠭᠠᠳ
ᠠᠪᠤ ᠶᠢᠨ ᠮᠠᠨᠠᠭᠰᠠᠨ
ᠠᠳᠤᠭᠤᠨ ᠰᠦᠷᠦᠭ ᠮᠢᠨᠢ
ᠠᠷᠤ ᠰᠢᠯᠢ ᠪᠡᠷ ᠳᠤᠷᠭᠢᠯᠳᠤᠬᠤ ᠰᠢᠭ᠋
ᠠᠬ᠎ᠠ ᠶᠢᠨ ᠬᠦᠭᠡᠭᠡᠭᠰᠡᠨ
ᠠᠯᠠᠭᠳᠠᠭ᠎ᠠ ᠨᠤᠭᠤᠳ ᠨᠢ
ᠠᠬᠢᠵᠤ ᠢᠷᠡᠭᠡᠳ ᠭᠡᠳᠡᠭᠡᠯᠡᠬᠦ ᠰᠢᠭ
      ᠬᠤᠶᠠᠷ
ᠨᠠᠮᠤᠷ ᠢᠷᠡᠨ᠎ᠡ ᠭᠡᠳᠡᠭ ᠢ
ᠨᠠᠰᠤ ᠦᠭᠰᠦᠨ᠎ᠡ ᠭᠡᠳᠡᠭ ᠢ
ᠪᠤᠳᠤᠵᠤ ᠤᠯᠤᠭ᠎ᠠ ᠦᠭᠡᠢ ᠪᠠᠭ᠎ᠠ ᠨᠠᠰᠤ
ᠠᠪᠤ ᠮᠥᠮᠥ ᠬᠤᠶᠠᠷ ᠢ ᠪᠡᠨ
ᠠᠰᠢᠲᠠ ᠠᠯᠳᠠᠨ᠎ᠠ ᠭᠡᠳᠡᠭ ᠢ
ᠠᠵᠢᠶᠠᠷᠬᠠᠵᠤ ᠶᠠᠪᠤᠭᠰᠠᠨ ᠦᠭᠡᠢ ᠦᠴᠦᠭᠡᠳᠦᠷ
ᠲᠤᠷᠭᠠᠨ ᠰᠠᠢᠬᠠᠨ ᠮᠠᠩᠬ᠎ᠠ ᠪᠠᠨ
ᠲᠤᠷᠤᠭ ᠰᠠᠷᠠᠨ᠎ᠠ ᠲᠠᠢ ᠲᠠᠯ᠎ᠠ ᠪᠠᠨ
ᠮᠥᠷᠦᠭᠡᠳᠦᠯ ᠪᠤᠯᠤᠨ᠎ᠠ ᠭᠡᠮᠡᠨ ᠪᠤᠳᠤᠭ᠎ᠠ ᠦᠭᠡᠢ
ᠪᠦᠲᠦᠨ ᠬᠤᠷᠸ᠎ᠠ ᠡ
ᠪᠦᠷᠢᠨᠵᠢᠭᠦᠯᠦᠨ᠎ᠡ ᠭᠡᠳᠡᠭ ᠢ  ᠪᠡᠨ
ᠪᠦᠲᠦᠭᠡᠬᠦ ᠶᠢᠨ ᠰᠠᠴᠠᠭᠤ ᠪᠦᠷᠢᠯᠭᠡᠨ᠎ᠡ ᠭᠡᠵᠦ ᠰᠠᠨᠠᠭ᠎ᠠ ᠦᠭᠡᠢ
       ᠭᠤᠷᠪᠠ
ᠨᠤᠲᠤᠭ ᠮᠢᠨᠢ ᠬᠡᠯᠳᠡᠭᠡᠢ
ᠠᠳᠤᠭᠤᠨ ᠲᠤᠭᠤᠷᠠᠢ ᠳᠤ ᠢᠨᠠᠭᠰᠢᠭᠰᠠᠨ ᠲᠠᠯ᠎ᠠ
ᠠᠩᠬᠠᠨ ᠤ ᠦᠩᠭᠡ ᠪᠡᠷ ᠨᠢ ᠠᠯᠠᠭ᠎ᠠ ᠪᠢᠯᠡ
ᠠᠷᠪᠢᠨ ᠬᠡᠦᠬᠡᠳ ᠲᠠᠢ ᠱᠤᠤᠭᠢᠯᠳᠤᠭᠰᠠᠨ ᠠᠮᠢᠳᠦᠷᠠᠯ
ᠠᠷᠪᠠᠨ ᠵᠦᠭ ᠲᠦ ᠪᠡᠨ ᠲᠠᠷᠬᠠᠯᠴᠠᠭᠰᠠᠨ ᠪᠢᠯᠡ
ᠵᠡᠭᠦᠳᠦ ᠮᠢᠨᠢ ᠬᠡᠯᠳᠡᠭᠡᠢ
 ᠡᠪᠡᠢ ᠬᠦᠭᠡᠷᠦᠬᠦᠢ ᠰᠢᠪᠠᠷ ᠪᠠᠢᠰᠢᠩ ᠮᠢᠨᠢ
ᠡᠵᠢ ᠲᠠᠢ ᠮᠢᠨᠢ ᠬᠠᠮᠲᠤ ᠳᠠᠯᠳᠠᠷᠢᠭᠰᠠᠨ ᠪᠢᠯᠡ
ᠡᠷᠬᠡᠯᠡᠭᠰᠡᠨ ᠬᠦᠭᠡᠷᠦᠬᠦᠨ ᠲᠠᠭᠤᠨ ᠮᠢᠨᠢ
ᠡᠷᠡᠨ ᠦ ᠬᠦᠷᠳᠦᠨ ᠳᠦ ᠲᠦᠯᠬᠢᠭᠳᠡᠭᠰᠡᠨ ᠪᠢᠯᠡ
ᠪᠤᠳᠤᠯ ᠮᠢᠨᠢ ᠬᠡᠯᠲᠡᠭᠡᠢ
ᠪᠦᠬᠦᠨ ᠢ ᠪᠠᠭᠲᠠᠭᠠᠶ᠎ᠠ ᠭᠡᠰᠡᠨ ᠰᠡᠳᠭᠢᠯ
ᠪᠦᠬᠦᠰᠢ ᠦᠭᠡᠢ  ᠳᠡᠬᠡᠨ ᠪᠤᠳᠤᠯ ᠮᠢᠨᠢ ᠬᠡᠯᠲᠡᠭᠡᠢ